అనకాపల్లి జిల్లా జనవరి 4 రాంబిల్లి మండలం అచ్యుతాపురం ఏపీఎస్ఈజెడ్‌లోని SVS కెమికల్ ఇండస్ట్రీస్ వద్ద శనివారం జరిగిన భారీ అగ్నిప్రమాదం తీవ్ర కలకలం రేపింది. ఈ ఘటనపై ఆంధ్రప్రదేశ్ రాష్ట్ర హోంమంత్రి వంగలపూడి అనిత తీవ్రంగా స్పందించారు. ప్రమాద స్థలాన్ని ఆమె స్వయంగా పరిశీలించి, ఘటన ఎలా జరిగిందన్న అంశంపై కంపెనీ ప్రతినిధులు, అధికారుల నుంచి వివరాలు సేకరించారు. ఈ సందర్భంగా కంపెనీ నిర్వహణపై హోంమంత్రి ఆగ్రహం వ్యక్తం చేశారు. “కంపెనీలో అవసరానికి మించి ఇన్ని ట్యాంకులు ఎందుకు ఏర్పాటు చేశారు?” అంటూ ప్రశ్నించారు. ఫైర్ సేఫ్టీ నిబంధనలు పూర్తిగా పాటించలేదన్న అనుమానాలు వ్యక్తం చేశారు. హోంమంత్రి అనిత మాట్లాడుతూ.. ఇది దురదృష్టకర ఘటన అని తెలిపారు. ప్రమాదం జరిగిన వెంటనే అధికారులు అప్రమత్తమై తక్షణ చర్యలు తీసుకున్నారని, ఫైర్ సర్వీస్ సిబ్బంది సమయానికి చేరుకుని మంటలను అదుపులోకి తీసుకువచ్చారని చెప్పారు. అలాగే స్థానిక ఎమ్మెల్యే సుందరపు విజయకుమార్ కూడా వెంటనే ఘటన స్థలానికి చేరుకున్నారని పేర్కొన్నారు. ఈ ఘటనపై రెండు రోజుల్లో పూర్తిస్థాయి నివేదిక సమర్పించాలని అధికారులను ఆదేశించినట్లు హోంమంత్రి వెల్లడించారు. ఇలాంటి ప్రమాదాలు భవిష్యత్తులో పునరావృతం కాకుండా కఠిన చర్యలు తీసుకుంటామని స్పష్టం చేశారు. బాధ్యతారాహిత్యంగా వ్యవహరించినట్లయితే కంపెనీ ప్రతినిధులపై చట్టపరమైన చర్యలు తప్పవని హెచ్చరించారు. నిర్లక్ష్యాన్ని ఎట్టి పరిస్థితుల్లోనూ సహించబోమని హోంమంత్రి అనిత కఠిన వార్నింగ్ ఇచ్చారు.