సంక్రాంతి ప్రయాణికులకు బిగ్‌షాక్‌.. పండుగ వేళ నిలిచిపోనున్న బస్సులు!

సంక్రాంతి పండుగ సమీపిస్తుండటంతో పట్టణాల నుంచి స్వగ్రామాలకు వెళ్లే ప్రయాణికులతో బస్టాండ్లు, రైల్వే స్టేషన్లు కిక్కిరిసిపోతున్నాయి. పండుగకు వెళ్లే వారు పది రోజుల ముందుగానే టికెట్లు రిజర్వ్ చేసుకుంటుండగా, పండుగ ముందు మూడు రోజులు, తరువాత మూడు రోజులు ప్రయాణికుల రద్దీ గరిష్ట స్థాయికి చేరుతుంది. ఇలాంటి కీలక సమయంలో **ఏపీఎస్ఆర్టీసీ**కి చెందిన అద్దె బస్సుల యజమానులు సమ్మె బాట పట్టే అవకాశాలు కనిపిస్తున్నాయి. ఈ నెల 12వ తేదీ నుంచి రాష్ట్రవ్యాప్తంగా ఆర్టీసీ అద్దె బస్సులు నిలిపివేయాలని యజమానుల సంఘాలు నిర్ణయం తీసుకున్నాయి. ఈ మేరకు ఇవాళ ఆర్టీసీ యాజమాన్యానికి సమ్మె నోటీసులు ఇవ్వనున్నట్లు సమాచారం. అద్దె పెంచాలని, నష్టాలు పెరుగుతున్నాయని అద్దె బస్సుల యజమానులు డిమాండ్ చేస్తున్నారు. స్త్రీశక్తి పథకం అమలుతో బస్సుల్లో అధిక రద్దీ పెరిగి, ఇంధన ఖర్చులు, నిర్వహణ వ్యయాలు భారీగా పెరిగాయని వారు చెబుతున్నారు. ఈ నేపథ్యంలో నెలకు అదనంగా రూ.5,200 అద్దె పెంచుతూ ఆర్టీసీ ఆదేశాలు జారీ చేసినప్పటికీ, అది సరిపోదని యజమానుల సంఘాలు అసంతృప్తి వ్యక్తం చేస్తున్నాయి. తమతో చర్చించి అద్దె మొత్తాన్ని మరింత పెంచాలని కోరుతూ సమ్మెకు సిద్ధమయ్యాయి. అధికారిక లెక్కల ప్రకారం 2025 నాటికి ఏపీఎస్ఆర్టీసీ వద్ద మొత్తం 11,495 బస్సులు ఉండగా, అందులో 8,716 సొంత బస్సులు, 2,779 అద్దె బస్సులు ఉన్నాయి.